Универзитетот „Гоце Делчев“ (УГД)-Штип ќе биде дел од Европската ноќ на истражувачи 2026, а ќе има бројни интерактивни активности посветени на науката, истражувањето и иновациите.
Од УГД-Штип информираат дека Европската ноќ на истражувачи е европска иницијатива која ја приближува науката до јавноста и создава можности за непосредна комуникација со научниците. Активностите се реализираат во рамки на проектот CHOOSE SCIENCE – „Избери наука! Градење на општеството преку истражување и иновации“.
Универзитетот „Гоце Делчев“ – Штип со активностите започнува утре на 24 септември, со пленарно предавање на академик проф. д-р Блажо Боев на тема „Важноста на К-Т геолошката граница во еволуцијата на Земјата“, во 11:00 часот, Амфитеатар 2, Кампус 2.
На 25 септември во Штип, програмата започнува во 9:00 часот со Отворени лаборатории на Кампус 2, а продолжува со панел-дискусија, предавања на професори од УГД и бројни научни и интерактивни содржини.
Централниот настан „Уметност и наука под ѕвездите“ ќе се одржи од 18:00 часот на плоштадот „Слобода“, со музичко-сценска програма, модна ревија, изложба на уметнички дела и штандови на факултетите на УГД и средните училишта.
-Со својата програма, УГД повторно ја отвора науката кон јавноста и создава простор за средба меѓу истражувачите, младите и граѓаните- соопштуваат од УГД-Штип.
