Водата за пиење во Штип е хемиски и бактериолошки исправна. Направените анализи покажале дека ги исполнува сите дозволени параметри и граѓаните можат безбедно да ја консумираат, информираат од ЈП „Исар“. Анализите се направени по вчерашниот прекин во водоснабдувањето, предизвикан од елементарната непогода во пробиштипскиот регион. Поради зголемена матност, филтер-станицата ја прекина преработката на сурова вода од ХС „Злетовица“.
„Водата е хемиски и бактериолошки исправна. Направени се сите потребни анализи, водата одговара на сите дозволени параметри и граѓаните можат слободно да ја консумираат… Во поголемиот дел од градот водоснабдувањето си беше нормално, затоа што тие добиваат вода преку резервоарски систем“, изјави директорот на ЈП „Исар“, Александар Арсовски.
Од штипското комунално претпријатие посочуваат дека квалитетот на водата се контролира и преку современата филтер-станица, каде што човечкиот фактор е сведен на минимум. Системот автоматски се блокира доколку водата не ги исполнува потребните стандарди.
„Секоја капка вода којашто низ водоводната мрежа се пушта од филтер-станицата, целосно стоиме и гарантираме зад нејзината безбедност, хемиска и бактериолошка исправност“, изјави директорот на ЈП „Исар“, Александар Арсовски.
Поради екстремно зголемената матност, денеска и филтер-станицата во Свети Николе не може да ја преработува водата од ХС „Злетовица“. Градоначалникот ги повика граѓаните рационално да ја користат водата, со цел резервите за водоснабдување да бидат доволни и евентуалниот прекин да трае што е можно пократко.
Силното невреме што во саботата вечер го зафати Источниот регион, посебно Пробиштипско и Кочанско, предизвика сериозни штети. Во Чешиново-Облешево сè уште трае санацијата на оштетувањата на електричната мрежа.
