„Шест години Лајка – не славиме бројка, славиме промена е мотото под кое “ЈП „Лајка” – Скопје одбележува шест години од своето постоење и по тој повод организира настан кој има за цел да ги истакне резултатите од шестгодишната работа на претпријатието, но и да ја отвори пошироката тема за одговорноста на поединците и заедницата во справувањето со проблемот со бездомните кучиња.
-Шест години постоење на ЈП „Лајка“ се значаен јубилеј, но и можност да се направи пресек на сработеното, на постигнатите резултати и на предизвиците што сè уште стојат пред нас. Зад секое третирано куче, секое успешно вдомување и секоја спречена несакана ситуација стојат многу работа, професионалност и посветеност на вработените. Нашата цел е одбележувањето да го искористиме пред сè за доближување на работата на претпријатието до граѓаните. Сакаме да ја зголемиме свеста дека решавањето на проблемот со уличната популација на кучиња не е одговорност само на ЈП Лајка, туку заедничка обврска на институциите, граѓаните и сопствениците на домашни миленици, вели директорот на „Лајка“ Војислав Димитровски.
Во рамките на активностите, нагласува посебен акцент се става на промоцијата на вдомувањето, одговорното сопствеништво и волонтирањето, како и на претставувањето на кучињата од прифатилиштето пред потенцијалните вдомувачи.
-Најголемата вредност на овој роденден ќе биде ако успееме што повеќе кучиња да добијат можност за нов дом и ако поттикнеме поголемо учество на заедницата во решавањето на проблемот преку активностите кои ги планираме за зголемување на јавната свест. Роденденот ќе се одржи на 17 октомври од 12 часот во паркот кај авиончето во Ново Лисиче и ги покануваме сите заинтересирани граѓани заедно со своите миленици да дојдат и заедно да прославиме, да се забавуваме и да секако да се едуцираме, додава тој.
Во рамки на програмата, ќе има изложба на детски цртежи. Учениците од ООУ „Блаже Конески” и ООУ „Кузман Јосифовски – Питу” преку своите цртежи ги претставиле кучињата од Лајка, испраќајќи порака за одговорно сопствеништво и ветување дека никогаш нема да ги напуштат своите миленици.
Преку овие активности, од „Лајка“ сакаат да потсетат дека проблемот со бездомните кучиња не започнува на улица и не може да се реши единствено во прифатилиште. Долгорочната промена, нагласуваат, бара одговорно сопствеништво, стерилизација, едукација, вдомување и заедничко дејствување на институциите и граѓаните.
Ќе бидат претставени десет кучиња од прифатилиштето, преку чии индивидуални приказни ќе се укаже на последиците од напуштањето, неодговорното сопствеништво и негрижата за животните. Ќе има ревија на вдомени кучиња – настан на кој вдомените миленици ќе бидат претставени преку нивните животни приказни, наместо според изгледот, расата или потеклото. За учесниците се обезбедени признанија и награди со поддршка од нашите спонзори, се вели во најавата од ЈП Лајка.
Исто така, ќе биде организирана креативна работилница со Luna Pet Shop – интерактивни активности во кои децата и нивните миленици ќе имаат можност за заедничко творење и дружење.
