Во Скопје ќе почне „Школата за иднини на грижа“, прва фаза од повеќегодишниот меѓународен проект „Семиња на солидарноста – Уметнички практики и екофеминистички сојузи за грижлива иднина“, посветен на грижата како феминистичка, еколошка и уметничка практика.
Проектот обединува уметници, куратори, истражувачи, културни иницијативи и заедници од јужна и источна Европа во соработка со партнери од Австрија, со цел развивање транснационални мрежи и долгорочни сојузи преку заедничко учење и размена на знаења.
Отворањето е во КСП „Центар – Јадро“, каде што ќе има обраќања на Христина Иваноска, Маргарете Маковец и Јане Чаловски. Во рамките на настанот ќе биде отворена и групната изложба „Мислејќи со материјата: четири лекции од водата и земјата“, под кураторство на Јованка Попова, со учество на Валбона Фејза, Христина Крстеска, Викторија Попоска и Ивана Самандова.
Во следните два дена програмата ќе се одвива на повеќе локации во Скопје, меѓу кои Водно, заедничката градина „Бостание“, реката Вардар и паркот „Вера Јоциќ“. Предвидени се перформативни прошетки, посети на локации и модерирани сесии посветени на еколошките и општествените предизвици во градот.
Организаторите посочуваат дека Школата е втемелена во локалниот контекст на Скопје и ги истражува прашањата поврзани со загадувањето, урбаната инфраструктура, заедничките простори и еколошката правда третирајќи ја грижата како практика на солидарност, заемност и колективна одговорност.
Институција домаќин на проектот е Press to Exit Project Space од Скопје, а носител е < rotor > Centre for Contemporary Art од Грац. Проектот е поддржан од Сојузното министерство за европски и меѓународни прашања на Австрија и Одделот за култура на покраината Штаерска.
