Семејствата на загинатите и повредените во трагедијата кај Ласкарци со остро писмо реагираат на одлуката на Врховниот суд да ја укине пресудата на Апелација и предметот да го врати на повторно одлучување.
Тие велат дека ова значи ново одложување на правдата и дополнително ја нарушува довербата во правосудството. Од несреќата во 2019 година поминаа повеќе од седум години, а судскиот процес трае шест години со над 150 рочишта.
„Она што го бараме е правда заснована на фактите и доказите изнесени во текот на судскиот процес, кои недвосмислено укажаа на причините што доведоа до трагедијата и врз основа на кои беше утврдена одговорноста во првостепената постапка, а потоа и во второстепената, без понатамошно одолговлекување и без никакви компромиси во утврдувањето на одговорноста за изгубените човечки животи. Законот мора да важи еднакво за сите, а правдата мора да биде достапна за секој граѓанин“, се вели во реакцијата.
Во трагедијата загинаа 16 лица, а повеќе од 30 беа повредени. Семејствата бараат конечна одлука заснована на фактите и доказите и утврдување на одговорноста без понатамошно одолговлекување.
