– Со залагање на раководството на месната заедница и финансиска и матерјална донација, се уредува рекреативната патека „Подмел“ долж кејот на реката Радика, кај селото Долно Косоврасти.
-Овој значаен зафат го поддржа Ерхан Махмуд, кој несебично донираше 1.500 евра и директно придонесе овој проект да се реализира. Неговата поддршка претставува вистински пример како поединец може да направи значаен придонес и добро дело за заедницата. Со подготвеност и во иднина повторно да помогне, информираа од месната заедница.
Исто така во оваа фаза се вградени околу 80 метри кубни тампон, а приближно 3/4 од патеката е уредена со дробен асфалт.
-Тампонот (дробен асфалт) е целосна дониран од Артан Дука, кој согласно своите можности, секогаш излегува во пресрет на барањата и потребите на Месна заедница Долно Косоврасти. Изведувач на работите е „Минти Транс“, со професионална изведба и изразена поддршка кон проектот преку поволни услови, нагласуваат од месната заедница, изразувајќи голема благодарност до сите што дале придонес.
Патеката, во должина од околу еден километар, е наменета за пешачење, велосипедизам и рекреација покрај познатата река Радика, каде време минуваат и спортски риболовци од многу градови во државава.
-Апелираме до сите граѓани да ја користат, да ја чуваат и заедно да продолжиме да ја унапредуваме нашата околина, апелираат од Месната заедница Долно Косоврасти.
Хортикултурно е уреден и просторот покрај новоизградениот пат од Косоврашки Мост кон селото, каде се засадени зимзелени украсни дрвца, со што влезот во селото доби поубав изглед за жителите и сите намерни или случајни посетители.
Селото е на оддалеченост од околу пет километри од Дебар, на левата страна од регионалот пат кон Маврово, а на негова територија се познатите по својата лековитост бањски локалитети, кои ги посетуваат не само домашни туку и странски туристи.
