Се реформира јавната администрација, се подобрува нејзината ефикасноста, транспарентност, и прецизноста во управувањето со човечкиот капитал во државните институции. Владата го промовираше Информациониот систем за управување со човечки ресурси. Преку него, ќе се воспостави прецизен регистар на вработени во јавниот сектор, ќе се намали времето за обработка на податоци, ќе има подобар и побрз пристап до точни и ажурирани информации за вработените. Премиерот Христијан Мицкоски е дециден дека со целосната имплементација на Информациониот систем за управување со човечки ресурси, се прави голема разлика – од хаос кон функционален систем, од пристрасност кон дигитална евиденција, од импровизација кон стратегија.
Преку овој систем, за првпат државата има целосна и транспарентна слика за тоа кој е вработен, каде, по кој основ, со кои квалификации, каква плата добива и дали е заслужена. Повеќе нема кумови, пријатели, советници по заслуга. Сега има податоци, перформанси и одговорност. Претходната власт не остави систем. Ни остави мрежа. Мрежа на влијанија, уцени, договорени функции и поставувања преку врски. Се криеја вработувања од јавноста. Се местеше документација. Луѓе без ден искуство раководеа со сектори. Тој модел го рушиме од корен. И на негово место градиме нов – праведен, транспарентен и контролиран систем, рече премиерот Мицкоски.
Според министерката за финансии, Гордана Димитриевска Кочоска, овој систем ќе придонесе за прецизна и навремена пресметка на платите, намалување на административните трошоци, и подобро буџетско планирање.
Ја поздравуваме оваа иницјатива на Министерството за јавна администрација. Овој систем ќе придонесе за прецизна и навремена пресметка на платите, намалување на административните трошоци, и подобро буџетско планирање, рече Димитриевска Кочоска.
Што се однесува до неефикасноста на дел од јавната администрација, оние кои не се компетентни да ја вршат работата на позицијата на која се поставени, ресорното министерство планира и формирање на Академија каде што кадрите ќе се дообучуваат во својата област. Уште еден чекор кон поефикасна администрација е и да престанат партиските вработувања.
Планираме да формираме Академија, тоа е еден од законите кои утре се на пленарна седница во Собранието, каде ќе се обучуваат кадрите. Секако дека овој систем ќе придонесе и да се спречи партизацијата, рече Минчев.
Реформите во јавната администрација се повеќе од неопходни, а со тоа ќе се постават и темелите за институционална стабилност и правичност – без политички влијанија.
