Уште неседнати во фотелјите, се соочија со сериозен отпор од партиските структури на речиси сите нивоа. Незадоволството од потезите, особено од кадровските политики на Венко Филипче изби на површина.
СДСМ наместо најавената стабилизација се соочува со внатрешни поделби и тензии.
За кратко време, од терен пристигнаа оставки од функционери кои на последните локални избори беа директно вклучени во трката – еден како редок победник, другиот како кандидат што ја носеше партиската кампања до крај.
Оставка од претседател на Општинската организација на СДСМ во Крива Паланка поднесе актуелниот градоначалник Сашко Митевски – еден од малкуте кадри на СДСМ што успеа да извојува победа на локалните избори. Во оставката адресирана до партискиот врв, Митевски, пренесуваат медиумите наведува дека одлуката е неотповиклива и дека, воден од вредностите што партијата ги застапува, ваквиот чекор го смета за најкоректен. Ова е веќе втора оставка по изборот на новото раководство.
Неколку дена претходно, функцијата претседател на Општинската организација на СДСМ во Битола ја напушти и Методија Куновски – кандидатот за градоначалник на последните локални избори, кој иако ја изгуби трката, остана дел од партиската структура сè до изборот на новиот тим.
Алфа побара коментар од партиската портпаролка, но Богданка Кузеска само рече дека треба да ги провери овие информации, до почетокот на вестите дополнителен одговор и објаснување нема.
Тензичната атмосфера, во меѓувреме, се префрли и на централно ниво. Поранешниот градоначалник на Скопје, Петре Шилегов, јавно го покажа своето незадоволство.
„Македонското законодавство познава убиство од небрежност. Познава и убиство со умисла, но не познава само убиство со умисла. Или тешка ви е одговорноста? Или ви тежи договорот? Или си СДСМ или си тезгарош. Прашањата ќе ги поставиме после празниците.“
Шилегов побара и оставка од Филипче.
Реакцијата од лидерот на социјал-демократите не изостана. Венко Филипче, преку социјалните мрежи, оцени дека станува збор за координиран обид за внесување немир во партијата.
„Вчера се обидоа и преку еден наш член да ѝ нанесат штета на партијата. Не мене лично, туку на целата партија и на сите нејзини членови. За помалку од половина час сите медиуми блиски до власта синхронизирано објавија. Тие пронајдоа еден од нас, послаб, и ги искористија неговите приватни проблеми за одвнатре да внесат немир во нашите редови. Ние го разбираме и нема да се пресметуваме со него. До него е да одлучи која страна ќе ја избере., напиша Филипче.
Дека на Бихаќка врие , покажува и фактот што сè погласно се зборува дека дел од решенијата за спас на СДСМ се туркаат за „по парламентарните избори“. Во партиските кулоари како можен иден фактор се споменува поранешниот потпретседател Игор Ивановски – човек што ги преживеа сите фази во партијата и беше дел од победничкиот тим на Горан Герасимовски во Општина Центар. Заедно со поранешниот генерален секретар Андреј Петров, според шпекулации, се разгледуваат иницијативи за промени – но дури по парламентарните избори.
