Граѓаните ја знаат предноста на сончевите системи и што може домаќинството да добие, но станува збор и за инвестирање. Топла вода, готвење, загревање, па и возење велосипед. Сончевата енергија многукратно е корисна, заштедува, граѓаните се заинтересирани за соларните системи и претворањето во електрична енергија, но се смета дека нивната примена би била поголема преку обезбедување субвенции.
Во центарот на Прилеп на плоштадот „Методија Андонов Ченто“ Центарот за климатски промени од Скопје одржа „Саем за соларни системи“ преку кој на прилепчани им ги објаснуваа предностите и потребата од примената на соларните системи во домаќинствата.
Според Филип Стојаноски од Центарот за климатски промени, инвестирањето е минимум 3 000 евра, а повратот е по осум години. Надежта е во новиот закон за обновливи извори и енергија и очекувањата дека државата ќе почне да дава субвенции за домаќинствата, како што се прави со инвертер климите.
-Граѓаните сакаат да инвестираат, но мора да се напомене дека за некои, 3 000 евра се многу пари. За да може да имаме поголем пробив на вакви технологии, мора да помага државата. Покрај тоа што државата инвестира во енергетски капацитети, дел од средствата треба да се пренаменат за субвенции, бидејќи кога ќе кажете 1 500 евра ви ги покрива државата, граѓанинот веќе почнува да размислува како да инвестира. Ако ние сакаме да имаме поудобни домови, да имаме помодерни технологии во нашите домаќинства, државата мора, преку Општините, да доделува средства за да почнеме да ги користиме овие технологии, вели Стојановски од Центарот за климатски промени од Скопје.
Според податоците од Регулаторната комисија за енергетика, во 2024 година се инсталирани 25 мегавати. Домаќинствата се корисници до 10, а институциите до 70 киловати.
