Опозициската СДСМ има проблем со блискоста на Владата со новата Администрација на САД. Им смета тоа што Македонија во рамките на Обединетите нации, застана отворено зад резолуцијата на САД за Украина, која патем беше усвоена во Советот за безбедност и за разлика од другата, подржана од Франција и Германија, оваа е обврзувачка.
Според лидерот на СДСМ, Македонија не требала да избира страна и во стилот на досегашната политика на претходната Влада, требала да седи на две столчиња, односно да гласа „за“ двете резолуции. Филипче ја обвини Владата дека со овој потег таа покажала дека македонската надворешна политика била без компас и дека се одлучувало импулсивно. Според него, Владата ја продлабочила конфузијата со тоа што прифатила да бидеме ко-спонзори на американската резолуција, а потоа сме гласаале воздржано.
Премиерот Мицкоски веднаш му реплицираше – на СДСМ и Филипче им пречи што имаме навистина исклучително добра соработка со новата Администрација на претседателот Трамп. Премиерот му објасни на лидерот на опозицијата дека резолуцијата на Советот за безбедност е обврзувачка, дека и останатите европски земји биле воздржани, а не против, што практично значи дека ја поддржале. Во однос на претходното гласање кажа дека тоа било направено во координација со Американците.
