Предлогот на Владата за разрешување на државниот јавен обвинител Љупчо Коцевски се очекува да се најде на дневен ред на следната пленарна седница во Собранието. Ова го соопшти претседателот на Собранието, Африм Гаши, на брифинг со новинарите.
Според Гаши, поканата до Коцевски сè уште не е официјално испратена, но таа треба да му биде доставена во текот на денот, со што ќе биде исполнета процедурата за негово присуство и изјаснување на седницата.
Претседателот на Собранието информираше и дека до крајот на декември се планирани вкупно четири пленарни седници. На 23 декември, пред пратениците, годишно обраќање треба да има претседателката Гордана Сиљановска Давкова, додека на 25 декември е закажана седница за пратенички прашања.
Покрај ова, Гаши најави дека во наредниот период се очекува усвојување на два значајни закони од реформската агенда – Законот за јавни патишта и Законот за Судски совет, додека за останатите реформски закони се чека тие официјално да пристигнат во собраниска процедура.
