Пукал кон својата сопруга, физички ја нападнал ќерката, а се заканувал на трите ќерки. Синоќа на 40 минути по полноќ приведен е 55 годишен насилник од Кисела Вода. Како што информираат од МВР, тој од својот пиштол испукал еден куршум кон 48 годишната сопруга, кој завршил во прозорец. По што отишол и се закнувал на трите ќерки на возраст од 26, 24 и 18 години, а средната ќерка и физички ја нападнал.
На час и половина пред полноќ, насилникот го повторил насилството, повторно со пиштол и се заканувал на сопругата, но ќерките го спречиле да го употреби огненото оружје. Од МВР велат дека по целосното документирање на случајот ќе биде поднесена соодветна кривична пријава.
-Знам дека потенцијалниот насилник е задржан во рамки на полициска станица и за истиот ќе се преземаат дејствија, согласно она што кое што го имаме утврдено како фактичка состојба. Битно е дека во конкретната ситуација за среќа немаме смртни последици. Повеќе детали не би сакал да споделам во овој момент, изјави првиот полицеац Панче Тошковски.
Покрај 55 годишникот од Кисела Вода, во полиција е приведен уште еден насилник поврзан со семејно насилство. Министерот за внатрешни работи Панче Тошковски, вели дека добро е што жртвите конечно имаат храброст да пријавуваат.
-Имаме уште еден насилник, кој што е задржан во рамки на полициска станица. И за овој случај ќе се постапува во соработка со Јавното обвинителство. Дали е ова последица на она кое што се случува во последно време, а е поврзано со охрабрување на жртвите да почнат да ги пријавуваат насилниците, дали е ова поврзано со тоа што вие новинарите посебно давате внимание на овој тим на насилства, изјави Тошковски.
Овие пријави за семејно насилство доаѓаат по трагичниот настан од пред неколку дена, кога Ивана и Катја Јовановски во понеделникот околу 14 часот загинаа по пад од шести спрат од зградата во која живееја. Обвинителството го сомничи сопругот и татко на жртвите, Стојанче Јовановски дека својата сопруга ја навел на самоубиство, физички ја малтретирал и и ја загрозил сигурноста.
Матеја Петровски
