Промоција на книгата „Видено под ноќна светилка (записи на стражарот)“ од Филип Клетников ќе се одржи вечер во 20 часот во малата сала на Народен театар – Гевгелија, во организација на Градската библиотека „Гоце Делчев“.
Делото е прва прозна книга на Филип Клетников, кое во себе ги обединува карактеристичните жанровски определници на прозната песна, краткиот расказ и есејот, велат организаторите.
Оваа хибридна форма му овозможува на Клетников да го распосле својот веќе препознатлив рефлексивен универзум во кој како ѕвезди усвитени до точка на експлозија светат најдлабоките егзистенцијални прашања и внатрешни човечки конфликти, (рас)чекорот помеѓу сетилното, стварното и спознајното на еден нов, естетски смел и непредвидлив начин, се вели во најавата на промоцијата.
Филип Клетников (1984) е македонски поет, есеист, раскажувач, кој во моментов докторира и предава на Катедрата за уметност и наука при Универзитетот во Орегон, САД. Автор е на збирките поезија: „Ништоцвет!“ (2025), „Стојач на работ“ (2018), „Метафизички сино“ (2016), „Крило и непрелет“ (2011), „Некаде помеѓу“ (2007), и голем број статии објавени во литературни списанија, како „Современост“, „Разгледи“, „Книжевно житие“ и други.
Промоцијата на неговата книга вечер во Гевгелија ќе биде збогатена со музиката на Теодора Гошева – Капсарова – Теда.
