Тековните реформски активности и идните приоритети во спроведувањето на Реформската агенда биле во фокусот на денешната средба на министерот за правда, Јетон Шасивари, со амбасадорката на Република Хрватска во земјава, Нивес Тигањ.
Како што соопшти Министерството за правда, посебен акцент бил ставен и на размената на знаења и искуства во усогласувањето на домашното законодавство со правото на Европската Унија, како и на јакнењето на институционалната соработка.
– Хрватска е наш пријател и поддржувач на патот кон европската интеграција, а нејзиното искуство од процесот на интеграција во Европската Унија е од особено значење за нашата држава. Ова искуство, особено во спроведувањето на реформите и усогласувањето со европските стандарди, претставува значајна поддршка за нашата држава на патот кон членство во Европската Унија – стои во соопштението од министерството
Оттаму дополнуваат дека на средбата била потврдена и заедничката определба за продолжување на партнерската соработка и размената на искуства со цел унапредување на реформските процеси и забрзување на европската интеграција на државата.
