Германскиот канцелар Фридрих Мерц преку писмо до лидерите на Европска Унија предлага нова динамика за пристап на земјите од Западен Балкан и Молдавија, преку постепено интегрирање. Тоа, според Мерц, значи дека земјите, преку градење блокови, постепено ќе ги прилагодуваат сопствените европски стандарди, „чекор по чекор“.
Ваквата идеја на Мерц ја става во геополитички контекст, имајќи ја предвид Украина. Со оглед на тоа што земјата е во војна, германскиот канцелар смета дека таа треба да добие статус на придружна земја-членка, која нема да има право на глас, а во меѓувреме постепено ќе ги применува европското законодавство и буџетот.
„Проширувањето на Европската Унија е геополитичка неопходност. Сепак, процесот на проширување трае предолго. Разбирливо е што ова создава фрустрација кај земјите-кандидатки, а исто така и кај земјите-членки. Затоа сум убеден дека ни е потребна нова динамика за Украина, како и за Западен Балкан и Молдавија.“
Мерц посочува дека ваквиот пристап би можел да помогне и во тековните мировни процеси и создавање посилни безбедносни гаранции за Украина.
„Постепената интеграција би можела да се воспостави со ‘градење блокови‘ кои би можеле да бидат основа за целосна примена на соодветните области на политиката, а потоа да биде придружена со зголемена поддршка во процесот на спроведување на правниот поредок на ЕУ. Сето ова би можело значително да ги доближи земјите-кандидатки до нас и со тоа да предизвика нова амбиција за понатамошни реформи потребни за постигнување полноправно членство“, наведува Мерц во писмото.
Предлогот на Мерц се испраќа само неколку недели пред самитот на Западен Балкан во Црна Гора, закажан за почетокот на јуни.
