Од вкупно 200 км водоводно-канализациона мрежа во општина Прилеп, 100 километри веќе се целосно реконструирани, а со тоа и загубите на вода значително се намалени. Ова е особено важно, велат од прилепски „Водовод“ и додаваат дека сега, со новите веќе изготвени проекти од кои добар дел ќе бидат финасирани и со пари од втората транша од унгарскиот кредит, Прилеп ќе го продолжи модернизирањето и на остатокот од нереконструираната водоснабдителна мрежа која е застарена и недоволно безбедна.
„Во 2024 од трите проекти еден е водоводен, а сега во 2025 ние сме спремни со повеќе проекти. Изборот моментално се врши в Општина, а ние ќе аплицираме како „Водовод и канализација“ со пет нови проекти, слични на овие проекти и во две населени места….Многу има во градов вакви стари линии кои што во периодов што следи ќе ги промениме во нови, а со то ќе добиеме поквалитетна вода и загубите ќе се намалат“, – уверува Игор Гулабоски, директор на ЈКП „Водовод и канализација“, Прилеп.
Покрај на овие пет проекти, „Водовод“ работи и на уште 3-4 други, а еден од поголемите е во населбата „Сточен пазар“, како и во неколку населени места. А во моментов, веќе дваесетина дена интензивно се работи во центарот од градот во населбата “Карабдалица“ каде 70-години стариот азбестен водовод се заменува со комплетно нов – полиетиленски, во должина од 1.024 метри.
„Рокот е 90 дена, но очекуваме дека за два месеци ќе биде комплетно вратена во првобитна положба и сите улици ќе бидат вратени во првобитна положба“, – вели Гулабоски.
Инаку, со првичната реконструкција на застарената водоводна мрежа во Прилеп се започна уште во 2006 година, со средства од КФВ банката во висина од над 9 милиони евра, кога во две фази до 2010 година беа реконструирани 40 км. Оттогаш наваму, освен што се реконструираа нови 60 км, во 2017 година беше пуштена во употреба и новоизградената модерна Пречистителна станица, беше воведен СКАДА-системот, а Прилеп беше и меѓу првите општини кој направи подземен Катастар на водоводната инфраструктура. Со сето ова, дотогашните огромни загуби на вода од над 70%, се сведоа под 50% со што општината денес се вбројува меѓу првите 10 општини во државава со најмали губитоци на вода.
Каролина Дурло
