Влегуваат во земјата како туристки, а ноќите ги минуваат забавувајќи ги гостите во ноќните клубови со егзотични танци. Последната акција на СВР Тетово откри 15 странски државјанки кои работеле нелегално во локали и го злоупотребиле туристичкиот престој. Но приказната оди многу подлабоко, надлежните се сомневаат дека станува збор за поширок синџир на нелегално вработување и за можна трговија со луѓе. Постои сомнеж дека танчерките и нивините менаџери веќе подолг период го изигрувале законот.
„При контролата во село Чегране во Гостивар, околу 2 часаот од слобода е лишан М.Х. 50 годишен од село Форино, Гостиварско. Тој откако ги забележал полициските службеници пред објектот, ја заклучил влезната врата и ги предупредил присутните да бегаат, но по брза реакција на полициските службеници, на задниот влез било спречено бегство на повеќе женски лица, странски државјанки.“ – вели портпаролот на СВР Тетово, Фатмир Реџепи.
Ова не е изолиран случај. Според информациите, меѓу приведените има и државјанка на Колумбија, а нејзини сонароднички и претходно биле затечени во вакви контроли, па депортирани назад во нивната родна земја.
„Поради злоупотреба на туристички престој односно престојување спротивно на целта приведени се вкупно 15 странски државјанки на возраст од 19 до 40 години од Србија, Албанија и Колумбија од кои 11 во Чегране и 4 во угостителскиот објект во подрачјето на полициското одделение Галате. Сите се задржани во полиција и по документирање на случајот ќе следуваат соодветни поднесоци.“- вели Реџепи.
Македонија не е единствена држава во регионот што се соочува со злоупотреба на туристичкиот престој. При слични полициски акции во Србија, Босна и Црна Гора, полицијата открила странски државјанки што формално престојувале како туристки, а работеле во ноќни клубови.
И бројките покажуваат дека ваквите случаи не се реткост. Само во текот на 2025 година, полицијата во Тетовско-гостиварскиот регион спровела 43 контроли во ноќни локали, при што биле затекнати 129 странски државјанки, а против 81 биле поведени постапки поради незаконски престој или злоупотреба. Меѓу нив, покрај државјанки од Албанија и Србија, имало и од Колумбија, Бразил, Венецуела и Украина, што укажува на континуиран тренд на ангажирање на странски државјанки во ноќните клубови.
