Министерот за здравство Сашо Клековски, претставници на Министерството за спорт, Олимпискиот комитет и EuropeActive денеска ќе учествуваат на заеднички панел за улогата на физичката активност во јавното здравје на „Health & Fitness Forum 2026“, во организација на North Macedonia Active.
Програмата, како што информира организаторот, ги поврзува здравствените политики, развојот на фитнес-бизнисите и практичните пристапи кон превенцијата. Под мотото Здравјето и фитнесот како инфраструктура, учесниците ќе разговараат за физичката активност како дел од здравствените политики и за соработката меѓу институциите, здравствените професионалци и фитнес-индустријата.
-Дискусијата на претставниците од двете министерства, Олимпискиот комитет и “EuropeActive” за јавното здравје е закажана од 10 часот и ќе ја отвори темата за придонесот на фитнес-секторот во превенцијата на здравјето и создавање поактивно население, информира Магдалена Спасовска, потпретседателка на North Macedonia Active.
На панелот ќе учествуваат: Сашо Клековски, министер за здравство, Гордана Цветковска Бошевска, посебен советник во кабинетот на министерот за спорт за ЕУ проекти и децентрализација, Ѓорѓи Тасев, генерален секретар на Олимпискиот комитет, Каи Трол извршен директор на EuropeActive.
-Дискусијата ќе биде можност за институционален дијалог за физичката активност, превенцијата од хронични незаразни заболувања и соработката меѓу јавниот и приватниот сектор. Бизнис-програмата ќе понуди искуства за привлекување и задржување клиенти, развој на фитнес-синџири и градење брендови, додава Спасовска.
Претседателот на North Macedonia Active, Јосиф Дамјанов, како што е најавено, ќе се осврне на состојбата и можностите за развој на домашната фитнес-индустрија, а воведното предавање „One Sector, One Movement“ на Магдалена Спасовска ќе ја претстави визијата за заедничко дејствување на секторот и неговата улога во унапредувањето на јавното здравје.
