Граѓаните, наместо да ги заробуваат парите во бетон и железо – станови, да имаат можност да учествуваат во изградбата на ХЕЦ „Чебрен“ – истакна Ацо Ристов, претседател на Регулаторната комисија за енергетика, водни услуги и услуги за управување со комунален отпад (РКЕ) на тркалезната маса „Зајакнување на конкурентноста – Енергетската транзиција“, CBAM и иднината на македонската индустрија организирана од „Фајнанс тинк“, соопшти прес-службата на РКЕ.
Енергетиката, посочи Ристов, не е привилегија само на државата, туку можност за сите. При реализација на стратешките објекти, освен класичното кредитирање, треба да се разгледа и можноста за воспоставување модел на акционерско друштво, каде што граѓаните ќе може да бидат дел и наместо да купуваат недвижности, да може да ги инвестираат парите во акции преку кои ќе се финансира изградбата, рече Ристов.
Осврнувајќи се на енергетскиот развој, дополни дека енергетската транзиција е реалност. Најавата за реализација на когенеративната централа во Битола од страна на ЕСМ ја оцени како јасна определба на државата за ослободување од фосилните горива. Најави дека следна регулаторна точка е е-мобилност.
– Кога зборуваме за енергетската транзиција, тука е и електрификацијата, односно е-мобилноста во транспортот. Сите западни држави, но и сите развиени држави, се над 50 проценти веќе со развиена е-мобилност, а ние сме само со 1 процент – тоа е поле на кое мора да се работи, тоа е иднината. Ние како регулатор почнуваме да подготвуваме регулатива и да дадеме основа и динамика за развој на овој дел – рече претседателот на РКЕ.
Во однос на јаглеродната такса, Ристов посочи дека цената на електричната енергија не е конкурентна на европскиот пазар и е регионално ограничена. Но, потенцира, задачата треба да се заврши и да има одвојување на производителите од обновливи извори и на оние од фосилни горива.
