Во рамките на денешната трибина “Правдата доаѓа“, пратеникот од редовите на ВМРО-ДПМНЕ, Љупчо Пренџов го изнесе своето мислење во врска со случајот на Лотарија и проневерата на 8 милиони евра, при што ја истакна поврзаноста меѓу СДС и ДУИ. Пренџов посочи дека СДС и ДУИ манипулирале со јавноста за да останат на власт, додека новата политичка генерација која дојде по 8 мај има целосно различен пристап.
„Тие манипулираат на мантадна основа со цел да бидат подолго време во власта. Разликата помеѓу порано и сега во Македонија после 8 мај, работите не се исти и дојде нова политичка генерација која не планира да прави ништо друго освен право, правда и решавање на криминал и корупција“, нагласи Пренџов.
Пренџов во своето обраќање истакна дека случајот со Лотарија е само почеток и дека во иднина ќе излезат нови детали за поврзаноста на владеачките партии со овој проект.
„Ќе има уште работи кои ќе излегуваат, ова се првичните контури на целиот тој проект, условно кажано Лотарија. Потоа ќе излегуваат кој каде изнајмувал, а тоа сите го знаеле“, изјави Пренџов.
Пренџов нагласи дека поврзаноста меѓу СДС и ДУИ не е само политичка, туку и егзистенцијална. Според него, таа поврзаност била клучна за СДС да остане на власт без широка поддршка од јавноста, додека ДУИ ја има улогата на клучен партнер кој ги поставува правилата на игра.
„Тие имаа една поврзаност, и таа е повеќе од политичка поврзаност, јас би рекол дека тоа е егзистенцијална поврзаност. СДС поддршка од јавноста немаше никаква од анкетите, да вие без народна поддршка и легитимитет и кредибилитет да имате премиер и министри, а ДУИ да бидат оние кои што ќе бидат оние кои ќе ги пишуваат правилата на игра за да бидете на власт“, истакна Пренџов.
Пренџов исто така истакна дека оваа поврзаност ќе продолжи и во иднина, но со нови предизвици, кога политичарите ќе мора да се соочат со своите постапки.
„Од сега ќе имаат и друга поврзаност, ќе ги поврзува стравот од соочување со она кое што го правеле, поврзаност на одговорност, сите овие кои до вчера беа власт во Република Македонија, тоа е добро за пример за општеството и здраво за демократијата“, додаде Пренџов.
Пренџов нагласи дека нема повеќе место за политичари кои се обидуваат да ги избегнат последиците од своите дејства и дека правдата ќе мора да се реализира преку институциите.
„Пораката сериозно се испраќа дека во Република Македонија, ‘како до сега’ времето го нема, политичари кои ќе се пазарат веќе нема и кој што правел тоа ќе го видиме сите во јавноста и ќе се процесира низ институциите на системот“, заклучи Пренџов.
