Во рамките на одбележувањето на 80 години од постоењето на гимназијата „Гоце Делчев“ во Куманово, вечерва во Центарот за култура „Трајко Прокопиев“ ќе биде изведена премиерата на театарската претстава „Крв не е вода“, во продукција на драмскиот клуб при училиштето, информираа денеска од гимназијата.
Претставата, која ќе се игра во два термини од 12:0 и од 20:00 часот, е резултат на долгогодишната работа на клубот што оваа година одбележува 15 години постоење под менторство на професорката по македонски јазик Соња Тодоровска. Автор на текстот е ученичката Мила Димковска од IV-1 клас, која инспирацијата ја црпи од делата „Чорбаџи Теодос“ од Васил Иљоски и „Диво месо“ од Горан Стефановски, комбинирајќи ги со современиот начин на живеење на македонското семејство. Режијата е на професорката Тодоровска, а на сцената настапуваат ученици од втора и четврта година.
-Драмскиот клуб не е само воннаставна активност, тој е училница за живот. Тука учениците учат да зборуваат, да слушаат, да чувствуваат, да соработуваат и да веруваат во себе. За мене, најголем успех не се само аплаузите и наградите, туку младите луѓе кои излегуваат од овој процес похрабри, посигурни и подготвени да го изразат својот глас- изјави професорката Тодоровска.
Во изминатите 15 години, клубот реализирал повеќе авторски и адаптирани претстави, како „Г-ѓа Авганистанка“, „Кој е овде луд“, „Лунатик“ и „Колку чини промената“, како и дела од Бранислав Нушиќ, Горан Стефановски, Коле Чашуле и Карло Голдони. Дел од продукциите биле наградувани на фестивали, меѓу кои ДАФ Кочани, како и на меѓународни настапи во Требиње и Земун. Професорката Тодоровска истакна дека особено значајно е што дел од поранешните членови на клубот денес професионално се занимаваат со театарска уметност.
-Особено сум горда што дел од учениците кои поминаа низ драмскиот клуб, денес го продолжуваат својот пат во уметноста, како актери, режисери и професори по драмска уметност. Тоа е најголемата награда за секој педагог. Сите наши претстави имаат по неколку репризи и секогаш се бара карта повеќе, а кумановската публика не ги штеди аплаузите и убавите зборови- додаде Тодоровска.
Премиерата на „Крв не е вода“ го заокружува јубилејот на гимназијата, потврдувајќи ја континуираната посветеност на учениците кон театарската уметност и создавањето нови генерации креативци.
