Триесет повозрасни лица, од кои петмина неподвижни, се безбедно извлечени по пожарот во Домот за стари лица во селото Чемерско, кавадаречко, информира Центарот за управување со кризи.
Пожарот започнал со запалување на оџакот, по што огнот се проширил и го зафатил кровот на објектот. Во моментот на избувнување, во домот биле сместени 30 лица. Благодарение на брзата реакција, сите се извлечени безбедно и ќе бидат пренесени во Општата болница во Кавадарци.
На терен интервенирале 10 пожарникари со три противпожарни возила, додека за дополнителна поддршка биле ангажирани три медицински тима и осум полицајци со две возила.
Благодарение на брзата интервенција на сите служби, евакуацијата заврши успешно без жртви или потешки последици.
