Универзитетот „Гоце Делчев“ – Штип преку Центарот за доживотно учење објави повик за учество на обука во програма за микроквалификација на тема: „Управување и надзор во безбедносниот сектор“.
Организаторот соопшти дека програмата е конципирана и структурирана како интердисциплинарна, десетдневна обука со цел да обезбеди продлабочено разбирање на демократското управување, реформата и надзорот на разузнавачко-безбедносниот сектор, во согласност со принципите на владеење на правото, човековите права и транспарентноста.
-Програмата е во согласност со Препораката на Советот на ЕУ од 16 јуни 2022 година за европски пристап кон микрокреденцијали (2022/C 243/02). Оваа програмата е развиена со поддршка на ДЦАФ-Женевскиот центар за управување со безбедносниот сектор и во соработка со Универзитетот „Гоце Делчев“ – Штип, претставници на граѓанскиот сектор и медиумите, со цел да одговори на реалните потреби за зајакнување на демократскиот надзор и јавната отчетност во безбедносниот сектор. Оваа активност е дел од Програмата за реформи на разузнавачкиот и безбедносниот сектор во Македонија (2021-2026) имплементирана од ДЦАФ и поддржана од Швајцарија, Шведска и Холандија, се наведува во повикот за аплицирање со рок 15 септември 2026.
Заинтересираните кандидати треба да достават кратка биографија (CV) на електронската адреса: [email protected], заедно со пријава која е достапна во објавениот повик.
Целта на програмата е да ги зајакне знаењата и практичните вештини на учесниците за: разбирање на структурата и функционирањето на безбедносниот сектор; анализа на безбедносните политики и законодавство; следење и известување за реформските процеси и за активно учество во демократскиот граѓански надзор и јавниот дискурс.
Повикот е наменет за претставници на граѓански организации; новинари и медиумски работници (вклучително и млади и аспиративни новинари); истражувачи и претставници на тинк-тенк организации; студенти од прв, втор и трет циклус на студии на новинарство. Програмата комбинира теоретско знаење со практична примена, со фокус на развој на аналитички, истражувачки и комуникациски вештини.
-Програмата е структурирана во релеватни тематски модули, меѓу кои: безбедносен сектор и реформски процеси; демократски надзор и улогата на граѓанското општество и медиумите; човекови права и национална безбедност; приватност и заштита на лични податоци; родова перспектива и агендата „Жени, мир и безбедност“; интегритет и антикорупција; сајбер-безбедност и дигитална трансформација; пристапите на НАТО и ЕУ во реформата на безбедносниот сектор; постлегислативна контрола на безбедносни закони и политики, се наведува во објавениот повик.
Наставата се реализира преку интерактивни предавања, студии на случај, практични вежби и симулации, работа во групи и дискусии. Програмата ќе ја реализираат професори од Универзитетот „Гоце Делчев“ – Штип, како и експерти од практиката, вклучително и етаблирани новинари и претставници на граѓански организации.
Програмата ќе почне на 16 септември 2026 и ќе се реализира еднаш неделно, во период од 16 септември до 18 ноември 2026, во Тренинг-центарот на Правниот факултет на УГД-Штип и бесплатна за учесниците. По успешно завршување на обуката учесниците ќе добијат сертификат од Универзитетот „Гоце Делчев“ – Штип.
