Три нови случаи на западнонилска треска во земјава потврдија за „Алфа“ од Центарот за јавно здравје. Со ова, бројката се искачи на 53 заразени и шест починати лица. Најмладиот пациент има 26 години.
Сите пациенти што се лекуваат на Клиниката за инфективни болести се со воспаление на мозокот. Петмина од пациентите што се на респиратор имаат и дополнителни тешки хронични заболувања. Досега се излекувани 27 пациенти.
Во меѓувреме, АХВ ги засили теренските активности за утврдување на епидемиолошката состојба со западнонилската треска кај живината на целата територија на државата.
Од АХВ апелираат до граѓаните да не паничат доколку забележат угината птица во урбана средина, туку веднаш да го пријават случајот.
Остануваат препораките до граѓаните да се заштитат од комарци и веднаш да се јават на лекар доколку почувствуваат симптоми кои може да упатуваат на западнонилска треска.
