Делегација на собраниската Комисија за европски прашања предводена од потпретседателот на Собранието и претседател на Комисијата Антонијо Милошоски во Тирана каде учествува на Интерпарламентарна конференција, се сретна со собраниската делегација на Ирска предводена од Бери Ворд, претседател на Заедничката комисија за прашања на Европската Унија при ирскиот Парламент.
Собраниската прес-служба соопшти дека била потврдена силната и континуирана поддршка од Ирска за европската перспектива на земјава и за напредокот кон полноправно членство во Европската Унија.
– Во разговорот беше истакнато значењето на примената на јасни, објективни и мерливи критериуми во процесот на пристапување, при што фокусот треба да биде ставен на исполнувањето на Копенхашките критериуми, спроведувањето на неопходните реформи и постигнатите резултати од секоја земја кандидатка. Беше нагласено дека пристапниот процес треба да се темели на мериторен принцип, односно напредокот да зависи од индивидуалните постигнувања и исполнувањето на преземените обврски. Во тој контекст, беше истакнато дека билатералните прашања не треба да го определуваат или попречуваат европскиот интегративен процес, туку дека клучен фокус треба да останат европските стандарди, реформите и исполнувањето на критериумите за членство, се наведува во соопштението.
Особено била поздравена поддршката од Ирска во периодот на нејзиното тековно претседавање со Советот на Европската Унија, како важен придонес кон одржувањето на кредибилен, предвидлив и заснован на заслуги процес на проширување.
Соговорниците ја истакнале и важноста од продолжување на парламентарната соработка и размената на искуства, особено во делот на европските интеграции, реформските процеси и јакнењето на парламентарниот надзор врз исполнувањето на европските стандарди.
