Во просториите на Општина Пехчево денеска беше потпишан договор за заедничка реализација на проектот „Воведување на мерки за енергетска ефикасност на јавни објекти и користење на обновливи извори на енергија (подобрување на условите во образовниот процес во ИПР)“.
Договорот го потпишаа градоначалникот на Општина Пехчево, Александар Китански, и директорот на Источниот плански регион, Трајче Здравков.
Во рамки на проектот, кој е финансиран од Бирото за регионален развој и Општина Пехчево, ќе се реализира активноста „Реконструкција на кров на ОЈУДГ ‘7 Септември – Пехчево’“.
Со реализацијата на оваа инвестиција целосно ќе биде реконструиран кровот на детската градинка, со што значително ќе се подобрат условите за престој и работа, обезбедувајќи побезбедна и поквалитетна средина за децата и вработените.
Градоначалникот Китански истакна дека станува збор за важен проект кој директно влијае врз квалитетот на предучилишното образование и условите во кои престојуваат најмладите.
„Како локална самоуправа остануваме целосно посветени на создавање подобри услови за нашите најмлади сограѓани. Инвестициите во детската и образовната инфраструктура се наш приоритет, бидејќи преку нив вложуваме во иднината на општината. Со реконструкцијата на кровот на градинката ‘7 Септември’ ќе обезбедиме побезбедни, поефикасни и поквалитетни услови за престој на децата и работа на вработените – изјави Китански.
Од Општина Пехчево информираат дека и во наредниот период ќе продолжат со реализација на проекти насочени кон унапредување на образовната инфраструктура, со цел подигнување на квалитетот на услугите и подобрување на животниот стандард на граѓаните.
