Владата будно ја следи состојбата, но засега нема да носи мерки против инфлацијата која според најновите податоци со просечни нешто под 4,5 % е најниска во регионот. Според анализата на Владата, транспортот, особено цената на керозинот, цигарите и алкохолот ја зголемиле инфлацијата во мај на 4,7%. За цените на транспортот премиерот Мицкоски најави дека се разгледуваат мерки во корист на граѓаните и можно намалување на даноците, а за цигарите и алкохолот нема да има мерки со цел да се заштити здравјето на граѓаните.
Фокусот на Владата е инфраструктурата но и капиталните енергетски проекти. Мицкоски најавува дека Владата е многу блиску до одлука сама да ги гради Чебрен и Галиште. Овој проект според премиерот е од големо значење за државата бидејќи освен што ќе придонесе за зголемување на производството на енергија, со него ќе се создадат два резервоара на питка вода и тоа како поттребни не само за нас, туку и за регионот.
„Доколку успееме да формираме синдикат на меѓународни финансиски институции, а разговорите се во таа насока, тогаш реално е да се очекува дека следната година ќе ставиме камен темелник на овој, би рекол, историски проект. Има многу причини за кои верувам и јас и колегите во Владата и во компанијата АД ЕСМ, поранешна ЕЛЕМ, дека треба да се обидеме, народски кажано, да стиснеме заби да го изградиме сами овој проект. Имајќи ги предвид климатските промени убеден сум дека не само на Македонија како држава, туку и во регионот ќе им требаат два резервоара за питка вода. А токму тие се тие акумулации, таков тип на резервоари, така што производството на електрична енергија можеби и не е примарен предизвик, можеби терцијален или четврти по ред“, рече премиерот Мицкоски.
На терен се засилуваат и активностите во делот на патната инфраструктура. Се очекува делот од Извор до Врбјани на автопатот Кичево – Охрид, со сите тунели, да биде целосно завршен и пуштен во употреба најдоцна до октомври годинава. Целосно, трасата од излезот на Кичево до Охрид се очекува да биде пуштена во првиот квартал од 2027 година. Месецов ќе почне да се работи и на автопатот. Скопје – Блаце. Мицкоски рече дека завршена е целата процедурата за избор на изведувач и веќе до крајот на месецов очекува да почнат првите теренски активности. Паралелно Владата според премиеропт е фокусирана и на поддршка на земјоделството во насока на зголемување на домашното производство.
