Продолжи есенската сеидба на житните култури во Штипскиот регион, но и во останатите региони во земјата. Потпретседателот на Асоцијацијата на земјоделци Гоце Серафимов вели дека обилните врнежи од дожд донесоа поволни услови за продолжување на сеидбата на пченицата и јачменот, која годинава значително доцни поради сушата. Според неговите проценки досега се посеани околу 20% од предвидените површини.
– Овие дождови се добредојдени, сега треба да чекаме само почвата малку да се исуши и да почнеме со орање, бидејќи околу 80% од површините сè уште не беа изорани – изјави Серафимов.
Тој вели и дека до крајот на сеидбата сè уште има време, но доцнењето може да влијае врз квалитетот на пченицата и јачменот. Дел од површините кои нема да се засеани сега ќе мора да бидат пренаменети за пролетните култури. Серафимов најави дека од наредната година ќе бараат субвенциите за јачменот и пченицата да се изедначат.
– Да, побаравме да се воведе некоја интервентна мерка, меѓутоа за оваа година е завршено и ќе пробаме за наредната. Бараме да се израмнат јачменот и пченицата – вели Серафимов.
Инаку, речиси сите површини кои се предвидени за житни култури се сеат наесен, бидејќи тогаш условите овозможуваат повисоки приноси.
