Советот на јавните обвинители денеска треба да одржи седница на која ќе бидат формирани комисии поврзани со постапката за избор на нов основен јавен обвинител на Основното јавно обвинителство за гонење на организиран криминал и корупција (ОЈО ГОКК).
Според дневниот ред на 50-тата седница, предвидено е формирање Комисија за подготвување кандидатски листи, како и Комисија за избор на основен јавен обвинител на ОЈО ГОКК.
На огласот за избор на нов раководител на ОЈО ГОКК досега се пријавени петмина јавни обвинители. Според информациите кои за МИА ги потврди претседателот на СЈОРМ, Башким Бесими, кандидатури поднеле вишиот јавен обвинител Јове Цветановски, обвинителот во Вишото јавно обвинителство и поранешен обвинител во СЈО Трајче Пеливанов, обвинителката од ОЈО Скопје Лидија Раичевиќ, како и обвинителите од ОЈО ГОКК Искра Хаџи-Василева и Фатон Азизи.
Огласот за избор на раководител на ОЈО ГОКК беше објавен согласно Законот за Советот на јавните обвинители и Законот за Јавното обвинителство. Според условите, право на кандидатура имаат јавни обвинители со најмалку шест години непрекинат стаж во обвинителската функција до моментот на пријавувањето и со позитивна оценка во последните три години.
Изборот на нов основен јавен обвинител на ОЈО ГОКК е закажан за 28 октомври 2026 година.
Постапката се спроведува поради истекување на мандатот на актуелниот раководител на ОЈО ГОКК, Ислам Абази, кој на функцијата беше избран во октомври 2022 година.
