Започна реконструкцијата на еден од најфреквентните мостови во Штип, мостот на реката Брегалница, кој го поврзува централното градско подрачје со индустриската зона. Градежните работи започнаа по спроведените стручни анализи, кои покажаа потреба од санација и зајакнување на конструкцијата. Со проектот е предвидена целосна санација на долниот дел од мостот, подобрување на неговата стабилност и носивост, како и реконструкција на коловозот, тротоарите и заштитната ограда.
„Оваа инвестиција е на ЈПДП, а вредноста на зафатот изнесува околу 30 милиони денари и очекувам во наредните месеци практично да ги завршат активностите на овој мост“, изјави градоначалникот на Штип, Иван Јорданов.
Во тек се дополнителни испитувања на статиката и состојбата на останатите мостови во градот. Приоритет ќе биде и реконструкцијата на Камениот мост, изграден во 1672 година и кој се води како споменик на културата, поради што за неговата санација ќе треба посебни конзерваторски процедури.
„Со оглед на тоа што овде имаме поразлични одобренија, конзерваторски, затоа што мостот е заштитен под Заводот за заштита на културното наследство, постапката е малку поразлична, но верувам дека и овде динамиката на завршување на предвидените активности ќе биде спроведена во најкраток можен рок“, изјави градоначалникот на Штип, Иван Јорданов.
Покрај обновата на постојните мостови, во план е изградба на уште два нови моста кои ќе овозможат подобро сообраќајно поврзување во Штип. Едниот ќе биде дел од новата обиколница што се гради, додека вториот ќе ги поврзува населбите Баби и Балканска.