Почина уште едно лице меѓу осомничените во истрагата за пожарот во дискотеката „Пулс“ во Кочани. Љупчо Грнчиштаров, поранешен главен инспектор во Дирекцијата за заштита и спасување, починал откако му се слошило во неговиот дом додека бил во куќен притвор.
Тој беше дел од обвиинението против 35 осомничени функционери во државни институции за кривично дело „тешки дела против општата сигурност“, поради сомнежи поврзани со издавањето согласност за паркинг просторот пред објектот.
Функцијата генерален инспектор ја извршувал од 2013 до трагедијата на 16-ти март 2025, кога бил осуден на 77 дена ефективен притвор, по што следел куќен притвор кој траел 14 месеци. Од Основното јавно обвинителство информираат дека е издадена наредба за обдукција со цел да се утврдат причините за смртта.
„Јавното обвинителство е известено. Обвинетиот починал откако му се слошило во домашни услови. Основното јавно обвинителство Скопје ќе издаде наредба за обдукција.“, изјавија од Јавното Обвинителство.
Ова е втор смртен случај меѓу осомничените поврзани со трагедијата во Кочани. Во октомври минатата година почина Владо Петров, еден од обвинетите полициски службеници.
Во моментов се водат три судски постапки поврзани со пожарот. Во една од нив обвинети се повеќе од 30 луѓе за истото кривично дело, додека другите две постапки се однесуваат на обвинети полициски службеници.
