Кампањата за изборите изгледа започна. Додека ВМРО-ДПМНЕ и официјално најави дека нивниот карван „Обнова„ од денеска тргнува на терен, Заев по десетина дена медиумска пауза го фрли на маса единственото оружје кое го има – Преспанскиот договор.
Како што наближуваат изборите, раководството на ВМРО-ДПМНЕ продолжува да заговара опасни идеи за укинување на договорот од Преспа. ВМРО-ДПМНЕ сака да го укине договорот кој не внесе во НАТО и не донесе на чекор до преговори со Европската Унија, изјави на денешната прес-конференција лидерот на СДСМ, Зоран Заев.
Дали е ова најава дека за време на кампањата ќе се обидува да ја натера опозицијата да се занимава со Преспа, што е лизгав терен, наместо со економијата, здравството, образованието и останатите области во кои власта досега речиси воопшто и не забележа видлив успех со кој би можела да излезе пред граѓаните.
Додека социјал-демократите наметнуваат расправа од типот „што би било кога би било“ од опозициската ВМРО-ДПМНЕ категорично одговараат дека ќе го ревидираат Преспанскиот со поддршка на граѓаните, односно ако добијат двотретинско мнозинство во парламентот.
Ние не се закануваме, ние покажуваме она што граѓаните го мислат и што ВМРО-ДПМНЕ го мисли, ние сепак стоиме позади тоа дека овој договор е штетен. И ќе биде штетен и ќе остане штетен бидејќи се задира во идентитетот, се задира во се она македонско. И точно така ние веќе неколку пати кажуваме дека доколку граѓаните ни дадат шанса ние ќе пробаме да го ревидираме. Не се закануваме по никого сакаме да имаме пријатели насекаде, но се разбира не треба да се срамиме од тоа што сме и никогаш нема да се срамиме. Ние сме Македонци и ќе останеме Македонци каде и да сме, истакна Владо Мисајловски – потпретседател на ВМРО-ДПМНЕ.
Останува отворено прашањето дали Заев и неговиот тим во недостаток на идеи за своја изборна програма, силите ќе ги насочат кон негативна кампања против идеите и програмата на ВМРО-ДПМНЕ.
Мери Ѓорѓиевска
