Груба манипулација со соучество на локален виш јавен обвинител. Премиерот Мицкоски предупредува од груби манипулации во случајот со Благојче Марковски, главно обвинетиот за кртиминал во РЕК Битола на кој судот во Струга му го врати пасошот. Премиерот предупредува дека овој случај нема така да заврши, гарантира дека ќе има истрага и одговорност:
-Не би сакал да шпекулирам со имиња, затоа што допвра ќе има истрага и ќе следи истрага за овој затоа што од страна надлежното Основно јавно обвинителство, имаме поинаков извештај од тој кој што е приложен како записник од тој кој што е приложен како извештај од Вишото јавно обвинителство тука во Битола. Така што ова нема така да заврши, ова јас лично во го гарантирам и јас лично ќе го следам овој процес, изјави Мицкоски.
Сопственикот на „Марковски компани“ со пет милиони евра гаранција, си го врати пасошот и веднаш замина во Србија, каде што има профитабилни бизниси. Според јавно достапните податоци Марковски поседува две фирми кај северниот сосед, кои последниве години работат профитабилно. Од 2009-та година ја има „Хаза Изградба“, која последниве три години бележи пад во работата, но сепак работи профитабилно. Во 2023-та имале профит од 98 милиони денари, во 2024-та добивката била 40 милиони, додека во 2025-та оствариле профит од 11,3 милиони динари.
Во декември на самиот крај на 2024-та година Марковски ја основал и фирмата „РСЈ-М Изградба“, веќе во 2025-та оваа фирма почнува да работи со профит од речиси седум милиони динари. Инаку, имотот на Марковски своевремено беше замрзнат, како во Македонија, така и во соседна Србија. Битолското обвинителство, преку Канцеларија за поврат на имот, упати барање до надлежните во Србија за замрзнување на неговиот имот таму, кој се состои 10 нови товарни и приклучни возила набавени во 2025 година за „Хаза Изградба“.
-Од српските органи беше побарано да му забранат на правното лице од Белград, на неговиот управител или на друго лице во нивно име да ги отуѓува, оптоварува или да располага со моторните возила за кои постои сомнение дека се набавени и претставуваат посредна имотна корист од кривичните дела за кои е отворена истрага. Дополнително, од српските власти е побарано да се обезбеди и да се отвори сеф за кој е утврдено дека осомничениот го поседува во една српска банка со цел да се провери неговата содржина. Поднесените барања се прифатени и српското обвинителство издаде наредби за замрзнување на наведениот имот, кажаа од ОЈО.
Инаку обвинението беше поднесено пред 7 месеци од битолското Обвинителство против осум физички и едно правно лице за тендер во РЕК „Битола“ вреден околу 1,7 милиони евра од 2023 година. Станува збор за набавката поврзана со дислокацијата на погонските станици од рудникот „Осломеј“ во рудниците на РЕК „Битола“. Покрај Марковски, обвинети се и петмина вработени во РЕК „Битола“ и двајца вработени во неговата компанија.
Матеја Петровски
