Докторите, сестрите, болничарите и останатиот технички персонал на Токсикологија добија забрана да даваат изјави на новинари, па дури и да се среќаваат со нив, без претходно одобрение од раководството односно организацсиката директорка, која за јавноста стана најпозната зашто не зборува македоснки и на работа оди во придружба на татко си.
Новите правила се објавени на огласната табла на Клиниката.
„Клиниката ја донесе следната наредба: За забрана на неовластено присуствување, давање изјави за јавност преку интервјуа и свикување прес-конференции. Се забранува неовластено свикување конференции за печатени и електронски средства за информирање, давање интервјуа и слично со што би се нанело штета на интересите на угледот на клиниката. Средба со новинари, други медиуми само со претходно известување на в. д. организацискиот директор. Непочитувањето на оваа наредба подлежи а санкционирање“, се вели во наредбата.
Оваа доаѓа ден по одлуката за доделување на решенијата за работа на 18 работници кои имаа истечени договори на дело на Токсикологија и една недела откако беше разрешен медицинскиот директор додека користише годишен одмор.
Дали е ова законски ДСЗИ ќе проверува деновиве. Од минатиот четврток 18-те лица повторно почнале да извршувааат работни задачи на Клиниката, иако за дел од нив од здравствениот инспектоарт беше посочено дека немаат соодветно образование.
Нововработените преку писмена изјава објавена од Министерството за здравство изнесоа обвинувања за доктор Нико Беќаровски на клиниката дека наводно ги навредувал на етничка основа зошто биле Албанци. Тој негираше и најави тужби, а зад него застанаа речиси сите лекари и најголемиот дел од вработените на Токсикологија.
