Пензионерите од Василево ќе добијат нов комплетно уреден простор за секојдневно дружење. По завршувањето на постапката за избор на најповолен понудувач, започнаа активностите на адаптација и уредување на просториите, кои се сместени во приземјето во Домот на културата во Василево.
Во информацијата од Општината се наведува дека ова е едно од ветувањата на градоначалникот Славе Андонов кои се реализираат и кои значат подобри услови и простор за сите генерации во Василево.
Адаптацијата опфаќа отстранување на стариот малтер, таван, подови и врати, како и урнување на еден од постоечките ѕидови, по што ќе следува малтерисување на ѕидовите, поставување на нов таван, подови, врати, современо осветлување и нови санитарни елементи.
Буџетот за сите планирани активности изнесува 1.015.611 денари, средства обезбедени од сопствните извори на приходи на општината, а адаптацијата треба да заврши до крајот на годината.
