Вака изгледа застрашувачкиот ТикТок предизвик наречен „Супермен“, кој се шири низ светот, но и во Македонија. Досега единаесет деца завршија на Клиниката „Св. Наум Охридски“ во Скопје, поради самоповредување во предизвикот за социјалната мрежа. Според информациите од Клиниката, децата се на возраст од 10 до 16 години, и истите биле примени во болница во периодот од 2 декември до вчера до 13 часот. Самоповредувањето за психолозите е несфатливо.
„За жал се поставува прашање, зошто на децата тоа им е интересно? Не само овој предизвик, имале други, претходно што сме ги знаеле, зошто на децата тоа им е интересно, зошто би сакале да ги повредат своите другари или да се повредат себе си? Од каде тоа интересно денеска, да некого повредиш, да го фрлиш во воздух и да се тргнеш на страна за да падне на земја“ вели Мирјана Јованоска Стојановска, психолог
Стручните лица порачуваат дека надлежните, родителите и сите кои се вклучени во образовниот процес и растењето на децата дека треба сериозно да разговараат со нив и да им посочуваат често на последиците, кои можат да бидат и фатални.
„Значи потребна е родителската контрола, потребна е контрола и општеството да најде начин како би можело да ги контролира тие содржини, некој програми кои би можеле да бидат, нели поголема контрола на она што децата можат да го видат, и подобар контекст со младите, повеќе грижа за нив, и во моменти кога доаѓаат со контекст на вакви содржини, ни соопштат што се случува, каде го нашле тоа, колку е лошо тоа за нив или кои се го работи тоа“ вели Мирјана Јованоска Стојановска, психолог
Да се насочат учениците кон предизвици со знаење, а не кон ТикТок – порача министерката за образование Јаневска.
„Ги повикувам средношколците наместо да имаат Тик-Ток натпревари да се насочат на натпревари во образованието и науката. Телефоните во училиштата можеме и да ги забраниме, но тие ќе им бидат достапни дома, во маало и во други средини. Децата треба да прифаќаат предизвици во образование и наука, а нивните родители, заедно со училиштето да ги насочат кон тоа“ вели Весна Јаневска, министер за образование и наука
Ова не е нешто ново кое што ТикТок го предизвикало меѓу младите. Во февруари минатата година, 14-годишно девојче беше жртва на струен удар од високо напонски жици на вагон во населбата Илинден, каде сакало да сними Тик-Ток видео.
Давид Крстевски
