Со вклучени сирени и дефиле низ улиците на градот, пожарникарите од Територијалната противпожарна единица од Охрид го одбележаа 20 Мај – Денот на пожарникарите.
На настанот присуствуваа претставници на службата, претставници од Фронтекс, градоначалникот на Општина Охрид, Кирил Пецаков, како и ученици од ОУ „Григор Прличев“.
Пожарникарите ги поздрави градоначалникот Пецаков, кој им се заблагодари за пожртвуваноста, храброста и максималната посветеност во извршувањето на секоја од работните задачи, им го честита празникот и секако им посака што помалку интервенции.
– Како Локална самоуправа, наш врвен приоритет останува континуираното инвестирање во оваа служба. Продолжуваме со подобрување на условите за работа во самата единица, рече Пеацков притоа врачувајќи му плакета на најдобриот пожарникар, Темелко Колоски.
Заменик-командирот Коста Кузмановски истакна дека ТППЕ Охрид веќе ги надминува балканските рамки и се движи кон европските стандарди.
– После 25 години се набавени нови интервентни униформи за сите 40 припадници на нашата единица. Со тоа безбедноста на пожарникарите е на едно високо ниво, а со тоа и безбедноста на граѓаните на Општина Охрид, Општина Дебрца, како и на туристите кои претстојуваат во нашиот град. Во соработка со локалната самоуправа, набавено е доста опрема во изминатиот период, така што можам да кажам со задоволство дека излегуваме од тие балкански рамки и веќе се ближаме кон европските рамки. Службата во моментов брои 40 пожарникари. Постои голем интерес за нашата служба и се надевам дека во следниот период ќе имаме и некои курсеви за да се направи правилна селекција, бидејќи едно е желбата, а други се можностите, рече Кузмановски.
Инаку, заедно со пожарникарите празникот го прославија и најмладите охриѓани, дечињата од основото училиште „Григор Прличев“, кои имаа несекојдневна можност да бидат дел од празничното дефиле односно да се повозат низ градот со противпожарните возила.
