Откако десната рака на Али Ахмети и судијата Енвер Беџети се најдоа на црната листа на САД, од зимски сон се разбуди државниот обвинител Љупчо Коцевски. Отвори предмет по допрен глас за двајцата, поради сомнежите на амбасадата на САД дека тргувале со влијание и примиле поткуп за застарување на кривична постапка од доменот на висока корупција. Ќе се истражува и оној што давал поктуп, брифираше Коцевски. Зошто вака не беше ажурен за другите корупциски скандали, државниот обвинител е дециден: не се за што објавуваат политичките партии и медиумите, има елементи на кривично дело.
Постои правосудна полиција и други истражни органи коишто треба да си ја завршат работата. Не може Обвинителството да постапува по однос на се што објавуваат медиумите или обвинуваат политичките партии. И за други лица од црната листа има истраги, Рамиз Мерко, Стевче Јакимовски. Отворен е предмет по допрен глас и за скандалите во Онкологија и набавката на компресори, вели Љупчо Коцевски, државен обвинител.
Коцевски не сакаше да ги коментира обвинувањата на премиерот Христијан Мицкоски дека во фиоки седат повеќе од стотина пријави, а обвинителите не постапуваат. Тврди дека институцијата којашто ја раководи ажурно постапува по секоја пријава.
На најголемиот брифинг што некогаш го организираше државниот обвинител, одговараше и шефот на Организиран криминал, Ислам Абази. Тој информираше за десетина истраги за посредување со проституција и дрога како и за злоупотреби од цариници и затворска полиција. Имано, последниве месеци, единствена истрага за висока корупција е случајот со поранешното раководство на ЕСМ. Организириран криминал го истражува и случајот со СОравија на внукот на Али Ахмеити Дрин Ахмети. Абази рече дека чекаат на меѓународната правна помош од САД како и од други институции и прибавуваат материјално докази.
Обвинителство за организиран криминал истражува и за надзорот на Бехтел и Енка. Неизвесно е дали ќе има кривична постапка со оглед на тоа што според обвинителите тешко е да се обезбедат материјални докази за сите злоупотреби наведени во ревизорскиот извештај.
На брифингот стана збор и за мотивот на убиствата на 14- годишната Вања Ѓорчевска и пензионерот од Велес, Панче Жежовски. Иако малолетната Вања е ликвидирана два часа по нејзиното грабнување, обвинителството тврди дека е на добар пат да докаже дека мотивот е користољубие.
