Хаос во образовните институции ќе наследи идниот градоначалник на Струга. Во 16 годишното владеење со Струга, Мерко кој го ситни 4-тиот мандат, ги изгуби ингеренциитеврз дел од воспитно-образовните институции. Министерството за образование му ги одзеде ингеренциите над две основни училишта,а ги изгуби и градинките.
Поради незаконско поставување на директори,министерството за социјална политика му ја одзеде надлежноста врз градинките во времетрање од најмногу една година, сметано од 19.02.2025 година.
Што значи новиот градоначалник извесен период не ќе може да раководи со градинките. Таму сеуште не е решен статусот на 18 негувателки,воспитувачки,хигиеничарки кои се ангажирани со договор на дело. Некои од нив скоро 2 децении до неодамна работеа за мизерна плата од 10.000 денари.
„Во врска со поднесените барања во министерството за финансии за обезбедување финансиски средства за вработување на 5 лица на неопределено време на работно место неговател.За истите е добиено известување за обезбедени средства во буџетот за 2025-та и истото е доставено до градинката на нивно натамошно постапување. Во врска со барањето за обезбедување финансиски средства за вработување на 1 лице на неопределено време на работно место воспитувач се уште, не е добиен одговор од министерството за финансии”, велат од Министерството за социјална политика.
Новоименувата директорка поставена од ресорното министерство вели дека сега земаат минимална плата односно 22.500 денари,пари кои ги обезбедува самата градинка.
„Колку што има буџет градинката толку се плаќа.Ама пак нормално требаат решенија затоа што некои работи што треба да се прават во градинката стопирано е се’ ништо не се прави за да се даваат пари.Место нема доволно за децата, имаме и листа на чекање а треба уште нова градинка да се прави.Има и други работи што не се во ред тука ама ќе се трудиме да се среди понатаму”, вели Флореше Емуш, директор на детската градинка „8 Март“ – Струга.
Инаку во моментов во градинките се згрижени 365 деца, 150 се на листа на чекање.Директорката е оптимист дека ќе добијат нов дополнителен објект и вработување на сите кои сега работат со договор на дело.
