Фантастични 675.000 евра, потроши град Скопје заедно со уште 20 општини низ Македонија за украсување на улиците и плоштадите, што е за 10 % повеќе од лани.
Како што открива анализата на Центарот за граѓански комуникации, само во главниот град „стопени се“ околу 490.000 евра, односно 73% од парите за новогодишното украсување, се потрошени во Скопје. Парите ги трошеле општините – Центар, Аеродром, Карпош, Чаир, Бутел, Гази Баба, и Шуто Оризари. Општина центар, годинава потрошила близу 57.000 евра, а Аеродром, 48.500 евра, соопштува Центарот за граѓански комуникации.
Споредено со претходната година, но и таа пред неа, намален е бројот на општини, што ги украсиле плоштадите, но е зголемена вредноста на тендерите.
Само Град Скопје за украсување на јавните површини потроши околу 285 илјади евра што е удел од 42% од вкупните пари за оваа намена.
Гледано во период од 5 години, Градот Скопје не ја смени фирмата со која го склучува договорот, но од година во година ја менуваше вредноста на договорите и тоа главно во нагорна линија. Оттука, вредноста на договорот за украсување на градот за дочекот на Новата 2020 е за речиси 70% поголема од договорот склучен за дочекот на Новата 2016.
Според базата на податоци, дури 91% од парите за украсување за новогодишниот дочек, завршиле кај две скопски фирми, „Линк Медиа Плус“ и „Метал-Вет-Ел“. Освен што договорите ги добиваат истите фирми, податоците велат дека продолжува и старата навика – на задоцнето објавување на огласите, за јавна набавка за новогодишно украсување, што, според „центарот за граѓански комуникации“, неповолно влијае врз конкуренцијата.
Инаку, пресметките на трошењата на општините се добиени од Електронскиот систем за јавни набавки.
Борис Грујоски
