Со претставување на творештвото и четирите стихозбирки на младиот поет Далибор Стојанов од Кочани, во Делчево започна годинашното издание на поетскиот караван „Вапцарови бранувања“, кој оваа година ќе се одвива низ четири содржински дела.
Манифестацијата е проект на Националната Установа Центар за култура „Никола Јонков Вапцаров“ од Делчево, а е финансиски поддржана од Министерството за култура.
Љупчо Петровски, стручен соработник по литературна дејност во центарот, истакна дека годинашниот поетски караван ќе вклучи истакнати поети и поетеси од источниот дел на земјата, кои преку своите творби ја потврдуваат виталноста и силата на пишаниот збор во овој регион.
Пред делчевската публика беше претставен богатиот творечки пат на Далибор Стојанов, започнувајќи од неговата дебитантска книга „Кај што не му говорат багремите“, преку стихозбирката „Кога тајно ги мамев чувствата“ и подлабоката емотивна книга „Воин во бесни ноќи“, па сѐ до неговото најново остварување „Македонија во стих и спомен“.
Критички осврт кон неговото творештво даде писателката и афористичарка Ленче Стојменова, која нагласи дека поезијата на Стојанов се движи меѓу интимното и колективното, исполнета со љубов кон татковината, фолклорната традиција и современите животни предизвици.
Културната вечер беше збогатена со рецитирање стихови од самиот автор, како и со музички изведби на традиционални мелодии од страна на музичарот Борче Стојменов.
