Поништувањето на деветтата генерација на Академијата за судии и јавни обвинители, што се случи поради воочени законски недоследности, дефинитивно се рефлектира врз и онака сериозниот кадровски дефицит во правосудството. Владата нуди решение: нов закон, нова генерација идни судии и обвинители и повеќе од 200 вработувања во судовите. Вербата е дека со тоа ќе се стабилизира системот и ќе се ублажи хроничниот недостиг на кадар во правосудството.
Кадровскиот дефицит е последица на долгогодишни слабости и проблеми кои се таложеле со години, истакнува заменик-министерот за правда, Ален Деребан. Најкритична е состојбата во судовите и обвинителствата во внатрешноста, како и во Граѓанскиот и Кривичниот суд во Скопје.
„Недоследностите во сегашното законско решение беа една од причините поради кои Управниот одбор на Академијата за судии и јавни обвинители ја поништи таа деветта генерација. Поради тоа ни е потребно донесување на новиот закон за да може да се распише нова генерација. Законот е во владина процедура и очекувам во брзо време да биде проследен во Собранието и донесен, за да може Управниот одбор на Академијата за судии и јавни обвинители да распише нов оглас“, вели Ален Деребан, заменик-министер за правда.
Покрај законските измени, експертите оценуваат дека за вистински напредок на правосудството се неопходни и темелни реформи. Тие посочуваат дека е потребна рационализација на судската мрежа, унапредување на обуката на судиите и јавните обвинители, како и зајакнување на нивниот интегритет и одговорност. Последните случаи во кои судии се најдоа под кривична одговорност, велат тие, дополнително ја разнишаа довербата на граѓаните во судството.
„Тоа е страшно. Тоа повеќе погодува отколку кој било друг случај на корупција што е пронајден надвор. Значи, некако се дуплифицира. Еден таков негативен настан има негативно влијание врз општите ставови и врз довербата во судството“, вели академик Владо Камбовски.
Покрај новите законски решенија, клучно е нивното доследно спроведување и следење на реформите за поефикасно и потранспарентно правосудство, вели Камбовски. Од Министерството за правда посочуваат дека голем дел од законите се дел од реформската агенда, меѓу кои и измените на Законот за Судскиот совет, чија цел е зајакнување на независноста на судската власт.