Поголема површина на обработено земјоделско земјиште и поголем број добиток како прв критериум, како и продадена количина на овластен откупувач како втор критериум, се новитетите во стратегијата за исплата на субвенциите за 2026 година.
Заострувањето на критериумите од Министерството за земјоделство има цел правилна распределба на средствата и зголемување на домашното производство на храна. Министерот Цветан Трипуновски вели дека на овој начин парите ќе завршуваат кај вистинските земјоделци, а не кај апликанти кои не го обработуваат земјиштето, а користат буџетски средства.
Минатата година, како што посочи, бил потпишан меморандум за соработка со кој државните земјоделски инспектори ќе ѝ бидат ставени на располагање на Платежната агенција, со цел контролите на терен да бидат поефикасни и да се спречи евентуално одлевање на средства.
Поради утврдени аномалии и нереални исплати во изминатиот период, Министерството веќе подготвува и нова стратегија за субвенционирање за седумгодишниот период што ќе започне во 2028 година. Како појдовна основа се предвидува значително зголемување на минималната обработлива површина за одредени култури, како и повисоки прагови за сточарското производство.
Целта е зголемување на домашното производство на храна, со што земјава би ја намалила увозната зависност и би создала услови за извоз на вишокот на странските пазари. Воедно, се разгледува и поддршка за земјоделците при обезбедување сертификати за квалитет, како и засилена кампања за купување домашни производи.
