Нови информативни табли се поставени во просторот околу црквата „Св. Кирил и Методиј“ и паркот „Македонија“ во Ново Делчево, со средства обезбедени преку наменската сметка за донации на Општина Делчево.
Вкупната вредност на донацијата изнесува 208.700 денари без ДДВ, односно 246.266 денари со вклучен ДДВ.
Градоначалникот на Општина Делчево, Иван Гоцевски, истакна дека овој простор има посебно значење за жителите на Делчево, бидејќи претставува место поврзано со нивните спомени, верата и заедништвото.
– Вредноста на едно дело не се мери во денари. Се мери во она што го оставаме зад себе за нашиот град, за нашата црква и за генерациите кои доаѓаат, посочи Гоцевски.
Тој упати благодарност до Делчевско-каменичкиот епископ г. Марко за, како што наведе, искрената соработка, меѓусебната почит и поддршката што се градат меѓу Општината и црквата.
– Кога сме обединети околу доброто, можеме да направиме многу повеќе за Делчево и за нашите сограѓани, порача Гоцевски.
Од Општина Делчево посочуваат дека со ваквите активности продолжува уредувањето и збогатувањето на јавните простори, со цел создавање подобри услови за граѓаните и зачувување на местата кои имаат значење за локалната заедница.
