Основните училишта „Партенија Зографски“ и „Кирил Пејчиновиќ“ во Општина Кисела Вода новата учебна година ќе ја започнат со подобрени услови за настава, по реализацијата на повеќе инвестиции во дигитализацијата, училишната инфраструктура и опремувањето со нов мебел.
Како што соопшти Општина Кисела Вода, во ООУ „Партенија Зографски“ е спроведена целосна дигитализација и модернизација на наставниот процес преку набавка на нова информатичка опрема, која вклучува лаптопи, смарт панели, таблети и гигабитни рутери за стабилна интернет-мрежа низ целиот објект.
Во училиштето целосно се заменети и клупите и столчињата за учениците од прво до четврто одделение, набавен е нов мебел за предметната настава, како и шкафчиња за наставниците и техничкиот персонал.
Инвестиции се реализирани и во ООУ „Кирил Пејчиновиќ“, каде што се набавени 150 нови столчиња, 75 училишни клупи и катедри. Училниците се опремени со телевизори и бели табли, а реконструирани и освежени се 7.500 квадратни метри ѕидни површини во десет училници и придружните ходници.
Од Општината информираат дека во пресрет на новата учебна година се обезбедени и бесплатни ранци со училишен прибор за секое прваче, како и училишни униформи за сите ученици.
