Првпат по шест децении, Струшките вечери на поезијата го менуваат терминот на одржување. Наместо традиционално во август, 65. издание на најголемата светска поетска манифестација ќе започне на 24 јуни. Причините се помали трошоци, подобри услови за гостите, но и надеж за поголема публика. Но, не само тоа – новиот датум носи и силна симболика.
„Токму на тој ден се одбележува еден, би рекол, исклучително значаен јубилеј за нас, бидејќи се навршуваат точно 165 години од објавувањето на Зборникот на браќата Миладиновци. Мислам дека таков јубилеј не можеме на подобар начин да го одбележиме, освен со почетокот на манифестацијата, која, впрочем, е основана и во нивна чест“, вели Никола Кукунеш, директор на Струшките вечери на поезијата.
Паркот на поезијата, пак, веќе 40 години е местото каде што лауреатите засадуваат дрвја, чувајќи ја меморијата на светската поезија преку живи споменици на најголемите поетски имиња.
Струшките вечери на поезијата повеќе од шест децении се амбасадор на културата не само на Струга, туку и на Македонија.
„Она што ние го носиме овде, како значајни личности од светот на поезијата, е важно и за целата држава, бидејќи со тоа испраќаме слика за тоа кои сме и какви сме. Она што воодушевува е фактот што имало лауреати кои најпрво го добиле „Златниот венец“ на Струшките вечери на поезијата, а потоа станале добитници на многу повисоки и попрестижни признанија, како што е Нобеловата награда“, вели Кукунеш.
Лауреат на 65. издание е холандската поетеса Анеке Брасинга.
Досега тројца македонски поети го понеле највисокото признание – „Златниот венец“: Блаже Конески, Матеја Матевски и Влада Урошевиќ.
