Македонската влада активно работи на надминување на застојот во евроинтегративниот процес. Самитот во Тиват и средбите на премиерот Мицкоски со францускиот претседател Макрон и германскиот канцелар Мерц, отворија можност за нов пристап кон решавањето на спорот со Бугарија и деблокирање на европскиот пат на земјата. За познавачите, средбите на премиерот со двајцата највлијателни европски лидери се значаен дипломатски успех на Владата и потврда дека Македонија е присутна на европската агенда.
„Двете средби кои ги имаше нашиот премиер со главните држави на унијата се значајни. Премиерот сам кажа дека добил одредени, не ветувања, туку одговори на проблемите со кои се соочуваме. Тој е единствениот кој се сретна со главните двајца лидери на унијата. Но, во целина состојбите се такви, Македонија мора да се сконцентрира на реформите, а тоа е и пораката од самитот во Тиват, дека тие што ќе напредуваат ќе имаат привилегии, да се приближуваат приклучуваат на некој начин во Унијата“, изјави аналитичарот Ристо Никовски.
Премиерот Мицкоски по самитот порача дека процесот на проширување останува жив и дека од разговорите со Макрон и Мерц добил убедувања и охрабрувачки сигнали дека напредокот на земјите кандидати треба да се вреднува според резултатите од реформите, а не според билатерални спорови.
„Во овие две години откако сум претседател на Владата, пораките од Самитот ЕУ–Западен Балкан во Тиват беа најсилни дека процесот на проширување не е завршен. Францускиот претседател Емануел Макрон и германскиот канцелар Фридрих Мерц дадоа силен мотив да продолжиме со реформите и да испорачуваме резултати врз основа на заслуги, а не врз основа на билатерални прашања“, изјави претседателот на Владата, Христијан Мицкоски.
Осврнувајќи се на француско-германскиот нонпејпер, премиерот истакна дека европските институции веќе добиле насоки за негова операционализација и дека документот предвидува подлабока интеграција на земјите од Западен Балкан во одредени европски политики и механизми. Според Мицкоски, нонпејперот не е замена за членството во Европската Унија, туку дополнителен механизам за приближување на регионот кон Унијата, кој ќе се одвива паралелно со процесот на проширување. Тој ја отфрли како неточна тезата на одредени експерти дека планот од нон-пејперот не може да се аплицира за македонија, поради тоа што земјата формално ги нема стартувано преговорите по кластери. Според него, документот е прецизно направен за да овозможи механизми дури и за земјите кои се само кандидати или немаат одржано прва меѓувладина конференција.
