Повеќе од 5,6 милиони евра за капитални инвестиции во булевари, улици и комунална мрежа доби Општина Струга од Министерството за транспорт за неполни две години – изјави денеска вицепремиерот и министер за транспорт Александар Николоски по увидот во градежните работи на улицата Источноколекторска и булаверот Туристичка.
Тој нагласи дека поддршката за Општина Струга ќе продолжи и оти на денешниот работен состанок со градоначалникот Менди Ќура ги утврдиле приоритетите за следниот период.
– Преку Министерството за транспорт се градат булаверот Туристичка, вреден 175 милиони денари, и улицата Источноколекторска, која се спојува со „Туристичка“. Во соработка со Светската банка имаме проект кај Езерски Лозја, кој се финализира и за кој денеска добивме уверување од изведувачот дека до крајот на следната недела работите ќе бидат завршени во целост и ќе може да биде пуштен во употреба – истакна Николоски.
Со поддршка на Владата, преку Министерството за животна средина и просторно планирање, додаде, се работат и неколку канализациски системи.
– Се работи канализацискиот систем во Враништа, мрежа од речиси седум километри, но ќе видиме дали ќе можеме да додадеме уште еден километар мрежа. Зборувавме и за нов проект, улицата Колекторска да продолжи до магистралниот пат од Струга до Охрид и кај Мислешево да се направи уште еден кружен со цел да се регулира сообраќајот и да се намалат жртвите. Ќе продолжиме да ја поддржуваме Општината и заеднички да работиме на големи инфраструктурни проекти – потенцира Николоски.
Градоначалникот Ќура се заблагодари за поддршката што Општина Струга ја добива од централната власт нагласувајќи дека од вицепремиерот и министер за транспорт Николоски побарале средства за за реализација за дополнителни проекти.
– Овде не е направено ништо со години. Ние за три месеци достигнавме до оваа фаза за изградба на улицата Источноколекторска, а ќе продолжиме и на другиот дел за да се поврзе улицата со главниот пат, со што ќе се намали и сообраќајниот хаос – изјави Ќура.
Прашан за неисплатените средства на превозниците, кои најавија дека нема да вршат превоз кон струшките села, Ќура повтори дека заостанатите долгови ќе бидат исплатени до крајот на годината.
– Старите долгови ќе се исплатат до 31 декември годинава. Како градоначалник предложив да се покачи и цената. Нормално, се чека да помине на Совет тоа покачување на цената. Можам да ги уверавам сите возачи, сите транспортери, дека сите долгови и назад за две-три години што останале од другата власт ќе се исплатат – рече Ќура.
Видеото може да го погледнете на следниот линк:
