Инвестициите во инфраструктурата клучни за енергетска стабилност и безбедност за време на криза. Вицепремиерот Николоски го потенцираше напорот за изградба на најважните патни и железнички коридори во земјава. Тој во Вашингтон учествуваше на глобален форум посветен на предизвиците во транспортот. Тој ја истакна важноста на геостратешката позиција на Македонија на Балканот и во Европа како точка кадешто се вкрстуваат двата пан-европски коридори. Николоски рече дека еден од проектите кои се приоритет за владата е брзата пруга која ќе чини две милијарди евра.
„Подготовките започнаа, а првите ископувања ќе ги видиме септември- октомври годинава, а целиот проект треба да го завршиме за 5 години, што значи дека целата територија на мојата земја ќе има брза железница не подоцна од 2031- 2032 година. Секако, конекцијата до Скопје ќе оди многу побрзо бидејќи е блиску до граница. Тоа е мошне амбициозна програма. Се работи за двојни пруги, како што е меѓу Белград и Будимпешта. Се обидуваме да го продолжиме она што веќе е започнато и тоа е одлично“ – вели Александар Николоски – Вицепремиер и министер за транспорт и врски.
Николоски потенцираше дека активно се гради и на патничките Коридори 8 и 10. Целта е да се развијат индустриски зони, долж овие коридори. На тој начин производите на компаниите ќе можат полесно да се транспортираат и преку железница и со камиони до пристаништата во Солун и Драч. Ова, според Николоски треба и тоа како да придонесе за зголемување на интересот за вложување во Македонија, а освен тоа јавните претпријатија ќе имаат и зголемени приходи од транзит на луѓе и стоки.
„Што се однесува до мобилизирањето приватен капитал, планираме по должината на двата коридори да основаме слободни трговски зони кадешто ќе можат да доаѓаат инвеститори, да отворат компании, фабрики и да работиме заедно и да имаме мулти-модуларен центар каде ќе се сечат двата коридори, а на тоа работиме со вас и други партнери“ – вели Александар Николоски – Вицепремиер и министер за транспорт и врски.
Николоски денеска учествуваше и на министерски состанок во Вашингтон организиран од Светска банка. На него, тој ги потенцираше инвестициите во инфраструктурата, како и модернизацијата на граничните премини со Бугарија и Албанија.
Вицепремиерот Николоски за време на посетата на САД, оствари повеќе средби во Стејт департментот во Вашингтон. Тој разговарал за продлабочување на стратешкото партнерство меѓу Македонија и САД. Во фокусот биле политичките и економските врски, како и можностите за поголема трговска и економска соработка меѓу двете земји со посебен акцент на коридорите 8 и 10 и енергетската транзиција.
