Од Катманду и Манила до Охрид – туристичката сезона и ова лето ќе ја спасуваат работници од азиските земји. Охридските ресторани, кафулиња и хотели сѐ потешко наоѓаат домашни угостители бидејќи заминуваат на сезонска работа, најмногу во Хрватска. Тоа ги принудува спасот да го бараат илјадници километри далеку – во Непал, Филипини и други азиски земји.
Дваесет и тригодишната Сусмета Гири од Катманду пред две години го напуштила Непал и дошла во Охрид. Вели дека е задоволна од условите за работа и животот во Македонија, а со помош на колегите го совладала и македонскиот јазик.
„Јас дојдов преку агенција и тука работам. Колку си задоволна од работата овде? Убаво е, работам во ресторан како келнерка. Дали повеќе пари земаш овде или во Непал? Тука има повеќе од Непал“, вели Сусмета Гири.
Сусмета не е единствена, со неа работат уште деветмина од Непал, а наскоро се очекува да пристигнат и нови работници. Недостигот од домашен кадар е реалност со која угостителите се соочуваат со години. Секогаш се трудиме да го задржиме персоналот со пристојни плати и добри услови за работа, но во недостаток на кадар бевме приморани да вработиме кадар од надвор, велат угостителите.
„Искуствата се добри, барем кај нас, бидејќи вработените сѐ уште, еве трета година, се тука активно. Вредни се, услужливи и задоволни се од условите и од платата. Мислам дека за нијанса се поисплатливи бидејќи нивните плати однапред се регулирани со договор и за нив се прифатливи, а за дел од нашиве не се прифатливи“, вели Игор Целески, менаџер на угостителски објект.
Иако ангажирањето странски работници носи дополнителни обврски и трошоци, дел од угостителите сметаат дека тоа е единствениот начин да се обезбеди континуитет во работата.
„Јас во принцип сум да не земаме луѓе од надвор, да се концентрираме на останатиот дел, на нашите луѓе да им дадеме нормални плати. Но, ако не можеме да најдеме, секако мора да донесеме од одредени држави бидејќи мора да функционираме“, вели Рашид Муса, сопственик на угостителски објект.
Сѐ додека домашниот кадар ја бара иднината надвор од државата или надвор од оваа професија, рестораните и хотелите ќе продолжат да ја пополнуваат празнината со работници од Далечниот Исток. Но за некои од нив Охрид и Македонија не се крајна дестинација. Откако ќе стекнат работно искуство и ќе го усовршат занаетот, размислуваат да заминат во земји каде што можат да заработат далеку повеќе.